བཙན་བྱོལ་ནང་གི་གསར་འགྱུར།

ཐེངས་བཅུ་དགུ་བའི་འཇང་དགུན་ཆོས་མཇུག་སྡོམ་ཉིན་མོར་ངེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་མཆོག་གིས་ཚོགས་འགོ་དུ་གཏམ་བཤད་གནང་བ་

 DSC03175ཐེངས་བཅུ་དགུ་བའི་འཇང་དགུན་ཆོས་སྒྲོལ་མ་གླིང་བཙུན་དགོན་དུ་ཚོགས་པ་དང་བསྟུན། ངེད་ལྷན་ཚོགས་ནས་རྒྱལ་གཅེས་བོད་ཀྱི་དཔའ་བོ་དཔའ་མོ་རྣམས་གཙོས་བོད་དོན་བདེན་མཐའ་སེལ་སླད། ཞབས་རིམ་༧རྒྱལ་བའི་ཞབས་བརྟན་དང་སྒྲོལ་མ་སྨིན་སྒྲུབ་ཞུ་རྟེན་ནམ། འདུས་ཚོགས་སུ་བསྙེན་བཀུར་དུ་གསོལ་ཇ་དང་བཞེས་བག བཙུན་མ་རེར་སྐུ་ཡོན་སྒོར་༥༠བཅས་བསྡོམས་ཧིན་སྒོར་༢༥༧༥༩་འབུལ་བསྐལ་བྱུང་བར་སྙིང་ནས་ཐུགས་རྗེ་ཆེ་ཞུ་དང་སྦྲགས། སྤྱི་ཚེས་༢མཇུག་སྡོམ་ཉིན་མོར་ངེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་མཆོག་གིས་ཚོགས་འགོ་དུ་གཏམ་བཤད་གནང་བ་ཁག་གཤམ་གསལ་ལྟར་རོ།DSC03163

 ༄༅།།  འདི་ཕྱིའི་སྐྱབས་གནས་མཁན་རིན་པོ་ཆེ་རྣམ་པས་དབུས་འཕགས་པའི་དགེབཙུན་རྣམ་པ། བོད་མིའི་སྒྲིག་འཛུགས་ཀྱི་ཆོས་དོན་དྲུང་ཆེ་མཆོག་དང་།  བུད་མེད་ལྷན་ཚོགས་ཀྱི་ཚོགས་ཟུར་དང་།  བཀའ་ཟུར།  བཙུན་མའི་ལས་འཆར་གྱི་དབུ་འཛིན་ལས་ཐོག་ལྕམ་སྐུ་རིན་ཆེན་མཁའ་འགྲོ་མཆོག་དང་།  བཙུན་མའི་ངེས་སྟོན་པ་བཙུན་མ་བློ་བཟང་བདེ་ཆེན་མཆོག་དང་།  གཞན་ཡང་འདིར་བྱོན་སྐུ་མགྲོན་རྣམ་པ་ལྷན་རྒྱས་ལ།   ངས་བོད་ཀྱི་བུད་མེད་ལྷན་ཚོགས་ཀྱི་སྐུ་ཚབ་ཞུས་ཏེ།  འཚམས་འདྲི་བཀྲིས་བདེ་ལེགས་ཞུ་རྒྱུ་ཡིན།   རྩ་ཆེ་དང་གལ་ཆེའི་བཙུན་མའི་འདུས་ཚོགས་འདིར་བུད་མེད་ལྷན་ཚོགས་ལ་གོ་སྐབས་གནང་བར་སྙིང་ནས་གུས་བཀུར་དང་ཐུགས་རྗེ་ཆེ་ཞུ་བ་དང་ཆབས་ཅིག་སྐད་ཆ་ཚིག་ཁ་ཤས་ཞུ་རྒྱུའི་ཐོག་མར་བུད་མེད་ལྷན་ཚོགས་ཀྱི་ངོ་སྤྲོད་སྙིང་བསྡུས་ཤིག་ཞུ་ཆོག་པའི་ཆོག་ མཆན་ཞུ་རྒྱུ་ཡིན།

ཕྱི་ལོ་ ༡༩༤༩ ཙམ་ནས་རྒྱ་ནག་དམར་གཞུང་གིས་བོད་སར་བཙན་འཛུལ་བྱེད་འགོ་བཙུགས་པ་ནས།  ༡༩༥༩།༣།༡༠ ཉིན་གྱི་བོད་ཀྱི་རྒྱལ་ས་ལྷ་སར་རྒྱ་གཞུང་གིས་དྲག་རྒོལ་བྱས་འོག་གནས་སྟངས་ཆེས་ཛ་དྲག་ཏུ་འགྱུར་ནས།   བོད་ཆོས་ལྡན་གྱི་རྒྱལ་ཁབ་འདི་བཞིན་ཆག་འཇིག་འགྲོ་བའི་གཉན་འཕྲང་གི་གནས་སྟངས་དང་དངངས་སྐྲག་ཡོད་པའི་སྐབས་དེར་རང་རེའི་བོད་ཀྱི་བུད་མེད་རྣམས་ཀྱིས་ཀྱང་རྒྱལ་གཅེས་ལྷག་བསམ་སྙིང་སྟོབས་ཞུམ་པ་མེད་པར།  རྒྱ་དམར་གཞུང་གི་བཙན་རྒོལ་དྲག་གནོན་ལ་གདོང་ལེན་བྱ་ཕྱིར།  ༡༩༥༩།༣།༡༢  ཉིན་གློ་བུར་དུ་གསར་འཛུགས་བྱས་པའི་བུད་མེད་ལྷན་ཚོགས་ཀྱི་སྒྲིག་འཛུགས་ཤིག་གི་ཐོག་ན་རྒྱ་གཞུང་ལ་དགོས་འདུན་དོན་ཚན་ཁ་ཤས་ཤིག་འདོན་ནས། ཞི་བའི་རྔམ་སྟོན་ཁྲོམ་བསྐོར་གཞི་རྒྱ་ཆེ་བ་ཞིག་གནང་ཡོད་པ་དང་།  བུད་མེད་བརྒྱ་ཕྲག་མང་པོ་སྐུ་སྲོག་ཤོར་ཡོད་པ་དང་།  འགོ་འཁྲིད་བུད་མེད་འཛིན་བཟུང་བཙོན་འཇུག་བྱས་པ་རྣམས་རིག་གནས་གསར་བརྗེའི་སྐབས་ཚང་མ་དམར་བསད་བཏང་ཡོད་པ་སོགས་ལོ་རྒྱུས་རང་བཞིན་ལྡན་པའི་ཆོལ་གསུམ་བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་གཅིག་པོ་དེ་ཡང་ཆགས་ཡོད། ༡༩༥༩ ལོར་བཙན་བྱོལ་དུ་འབྱོར་རྗེས།  ༡༩༨༤   ལོར་༧སྤྱི་ནོར་༧གོང་ས་༧སྐྱབས་ མགོན་ཆེན་པོ་མཆོག་གིས་བཀའ་སློབ་ཕེབས་དགོངས་བཞིན།  ཕྱི་ལོ་༡༩༨༤ལོར་བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་སླར་གསོ་ཞུ་ཐུབ་པ་བྱུང་སྟེ་བཀའ་ཟུར་ལྕམ་སྐུ་རིན་ཆེན་མཁའ་འགྲོ་མཆོག་གིས་ཐེངས་གསུམ་གྱི་རིང་ལ་ཚོགས་གཙོའི་ཐུགས་འགན་བཞེས་གནང་ཡོད་པའི་བཀྲིན་དང་དེ་བཞིན་དབུས་ས་གཉིས་རྒྱུན་ལས་རིམ་ བྱོན་གྱིས་སྐུ་ལས་སྐྱོན་པས་འབྲས་བུར་ད་ཆ་སྒྲིག་འཛུགས་སྲ་ཐག་ཐག་གཅིག་ཆགས་ཐུབ་པ་བྱུང་བར་ངོས་འཛིན་ཞུ་ཡི་ཡོད།

DSC03194ད་ལྟའི་ཆར་བུད་མེད་ལྷན་ཚོགས་ཀྱི་ཁྱབ་ཁོངས་ཨེ་ཤ་ཡ་གཙོས་རྒྱལ་སྤྱིའི་གླིང་ཕྲན་བཞི་ཡི་ནང་ས་གནས་ཡན་ལག་༥༦ དང་ཚོགས་མི་གྲངས་ ༡༦༠༠༠ ཙམ་ཡོད་པས་ཐོག་ནས་ དབུ་མའི་ལམ་གྱི་སྲིད་ཇུས་ལ་བརྟེན་ནས་བོད་ཀྱི་བདེན་པའི་འཐབ་རྩོད་ཀྱི་ལས་འགུལ་སྤེལ་རྒྱུས་མཚོན་བོད་ནང་སྨྲ་བརྗོད་ཀྱི་རང་དབང་མེད་པའི་བོད་མི་རྣམས་ཀྱི་མགྲིན་ཚབ་བྱས་ནས་རྒྱ་ནག་གཞུང་གི་མཁྲེགས་བཟུང་སྲིད་ཇུས་འོག་བོད་ཀྱི་ཆོས་དང་རིག་གཞུང་། ཁོར་ཡུག་དང་བཅས་པ་རྩ་མེད་བཟོ་བཞིན་པའི་གནད་དོན་རྣམས་དང་།  རང་རྒྱལ་སྲུང་སྐྱོབ་ཆེད་བོད་ཕྱི་ནང་གཉིས་ནས་རྒྱལ་གཅེས་དཔའ་བོ་དཔའ་མོ་ ༡༢༡ ཙམ་གྱིས་རང་ལུས་མེར་བསྲེགས་བཏང་ཡོད་པའི་དངོས་ཡོད་གནས་ཚུལ་རྣམས་རྒྱལ་སྤྱིའི་ སྟེང་ཁྱབ་སྤེལ་ཞུ་རྒྱུ་བཅས་ཀྱི་ལས་འགུལ་སྤེལ་གྱི་ཡོད་པ་དང་། དེ་མཚུངས་བུད་མེད་ཀྱི་ ནུས་སྟོབས་གོང་འཕེལ་གྱི་ཟབ་སྦྱོང་དང་།  འགན་ཁུར་སྣེ་འཁྲིད་ཀྱི་ཟབ་སྦྱོང་། བཙུན་མའི་ འགན་ཁུར་སྣེ་འཁྲིད་ཀྱི་ཟབ་སྦྱོང་སོགས་ལོ་ལྟར་གོ་སྒྲིག་ཞུ་ཡི་ཡོད་ལ།  ༢༠༡༣ ནས་འགོ་འཛུགས་ཀྱིས་ད་ལྟ་བར་བོད་མིའི་གནས་ཡུལ་ས་གནས་བཅུ་བདུན་ལ་བསྐོར་བསྐྱོད་ཀྱིས་བུད་མེད་གཙོ་བོར་བྱས་ནས་ཕོ་མོ་དབྱེར་མེད་ལ་གནས་ཡུལ་རྒྱ་གར་གི་ཁྲིམས་ཀྱི་བུད་མེད་ལ་སྲུང་སྐྱོབ་ཇི་ཡོད་ཐོག་ངོ་སྤྲོད་དང་གོ་རྟོགས་སྤེལ་རྒྱུའི་ཟབ་སྦྱོང་ད་ལྟ་འགྲོ་བཞིན་ཡོད།  ལྷག་པར་བུད་མེད་ལྷན་ཚོགས་ཀྱི་ཚོགས་ཆེན་ཐེངས་དང་པོའི་ཚོགས་བཅར་ཡོངས་ལ་༧གོང་ས་མཆོག་གི་མཇལ་ཁ་བཀྲིན་བསྐྱངས་སྐབས་སུ།  བུད་མེད་ཚོགས་པས་བཙུན་མ་ཚོའི་སྟེང་ལའང་བསམ་བློ་གཏོང་དགོས་ཞེས།  བཀའ་སློབ་གནང་ཡོད་པ་སྙིང་བཅངས་ཀྱིས་ཚོགས་ཆེན་ཐེངས་གསུམ་པ་ནས་བཙུན་མ་དང་འབྲེལ་བ་ཆེར་བཞག་སྟེ།  བཙུན་མ་བུད་མེད་ལྷན་ཚོགས་ཀྱི་ཚོགས་མི་དང་དབུས་རྒྱུན་ལས་སུ་ཕེབས་པ་བྱུང་ཡོད་ཀྱང་།  བར་ལམ་ནས་བཙུན་མ་ཚོགས་མིར་འཛུལ་ཞུགས་ཀྱི་གྲངས་འབོར་ཆེས་ཉུང་དུ་ཕྱིན་རྐྱེན་ཕན་ཚུན་འབྲེལ་བའང་སྔོན་བཞིན་ཡོང་གི་མེད་སྟབས་། ད་ལན་འདིར་བཙུན་དགོན་སོ་སོ་ནས་གནད་ཡོད་དང་དགོངས་པ་བཞེས་ཐུབ་མཁན་གྱི་བཙུན་མ་ཤ་རྟག་ཕེབས་ཡོད་པར་སོང་། གོ་སྐབས་འདི་བརྒྱུད་དེ་འབོད་བསྐུལ་ཞུ་རྒྱུར། བུད་མེད་ལྷན་ཚོགས་ཀྱི་སྒྲིག་འཛུགས་འདི་དང་བཙུན་མའི་བར་འབྲེལ་བ་ཧ་ཅང་གི་ཆེན་པོ་ཞིག་རང་བཞིན་གྱི་ཆགས་ཡོད་སྟབས་བཙུན་མ་རྣམས་ནས་ས་གནས་གང་དུ་བཞུགས་ཡོད་མེད་ལ་མ་བལྟོས་པར་བུད་མེད་ལྷན་ཚོགས་ཀྱི་ཚོགས་མིར་ངེས་པར་དུ་འཛུལ་ཞུགས་གནང་རྒྱུར་དགོངས་བཞེས་ཡོད་པ་ཞུ་རྒྱུ་དང་ཆབས་ཅིག་བུད་མེད་ལྷན་ཚོགས་ཀྱི་ལས་འགུལ་སྤེལ་སྐབས་ལས་འགུལ་ནང་འཛུལ་ཞུགས་གནང་རྒྱུར་བཙུན་དགོན་སོ་སོ་ནས་དགོངས་པ་བཞེས་གནང་ཡོང་བའི་འབོད་བསྐུལ་ཡང་ཞུ་ཡི་ཡོད།  བུད་མེད་ལྷན་ཚོགས་ཀྱི་སྒྲིག་འཛུགས་འོག་ནས་བུད་མེད་སྐྱ་སེར་གཉིས་ཕྱོགས་ནས་སངས་རྒྱས་ཀྱི་བསྟན་པ་རིན་པོ་ཆེ་རྒྱུན་འཛིན་གོང་འཕེལ་གཏོང་རྒྱུ་དང་བོད་ཀྱི་བདེན་པའི་འཐབ་རྩོད་བཅས་ལ་མཉམ་རུབ་ཀྱིས་ཞབས་འདེགས་ཞུ་རྒྱུ་ནི་ད་ལྟའི་ཆར་ཛ་དྲག་ཏུ་ཆགས་ཡོད།DSC03347

བོད་ནང་གྲྭ་བཙུན་སུ་ཐད་ནས་རྒྱལ་ཁབ་སྲུང་སྐྱོབ་ཀྱི་ལས་འགུལ་ནང་ཆ་ཤས་ལེན་ཚེ་འཛིན་བཟུང་དོ་དམ་འོག་ཚུད་རིགས་རྣམས་དགོན་པར་ཕྱིར་ལོག་མི་ཆོག་པ་མ་ཟད་བཙན་དབང་གིས་སྐྱ་སར་བབས་བཅུག་པ་སོགས་ཀྱི་གནས་སྟངས་འོག་བསྡོད་ཐབས་བྲལ་ཏེ།  ༡༩༩༠  ལོར་བཙུན་མ་ ༦༦ ཙམ་གློ་བུར་དུ་བཞུགས་སྒར་དུ་འབྱོར་བའི་འཕྲོད་རྐང་པ་ ནད་པ་དང་། རྐང་པའི་མཛུབ་མོ་ཆད་པའང་བྱུང་ཡོད་པ་རྣམས་ལ་བུད་མེད་ལྷན་ཚོགས་ ཀྱིས་སྨན་བཅོས་དང་ལྟ་སྐྱོང་གི་མཐུན་འགྱུར་སོགས་གནང་ཡོད་པ་དང་།  བཙུན་མ་ཚོར་སློབ་གཉེར་གནང་ཡུལ་གྱི་རིས་མེད་ཆེས་མཐོའི་བཙུན་མའི་གཙུག་ལག་སློབ་གཉེར་ཁང་གཅིག་དང་།  བཙུན་དགོན་གཅིག་བཅས་གསར་རྒྱག་ཞུ་རྒྱུའི་ས་ཁང་སོགས་སྤུས་གཟིགས་གནང་རྒྱུར་རོགས་རམ་ཐབས་འཚོལ་ཐུབ་ཏེ་སྒྲོལ་མ་གླིང་ཞེས་མཚན་གསོལ་དང་འབྲེལ་ས་ཆོག་སོགས་ཞུས།  རྗེས་སུ་ལས་གཞི་རྒྱ་ཆེ་རུ་ཕྱིན་པ་སོང་། བཙུན་མའི་ལས་འཆར་གྱི་ལས་བྱེད་ཆེད་བཙུགས་གནང་ཡོད་པ་དང་སྐབས་དེར་ཆོས་དོན་ལས་ཁུངས་ དང་བུད་མེད་ལྷན་ཚོགས་གཉིས་མཉམ་འབྲེལ་ཐོག་བཙུན་མའི་ལས་འཆར་ལག་བསྟར་གནང་སྟེ་བཙུན་དགོན་ཁག་དང་།  ཁ་ཐོར་བཅས་ཀྱི་བཙུན་མ་ཞལ་གྲངས་༢༠༠  བརྒལ་བར་འཚོ་གོས་གནས་མལ་སོགས་ཀྱི་མཐུན་རྐྱེན་ནར་གཏོང་ཞུས་ཡོད་ཀྱང་།  གོང་ཞུས་ལྟར་ལས་གཞི་རྒྱ་ཆེན་པོ་ཡིན་པ་དང་། འཛུལ་ཞུགས་གནང་མཁན་མང་དུ་འགྲོ་ཡི་ཡོད་པ།  སློབ་སྦྱོང་དང་གནས་མལ་གང་ཅིར་ཚགས་ཚུད་ཡོང་རེ་བཅས་དགོས་པ་རྒྱུ་མཚན་མང་པོར་གཟིགས་ནས།  བཙུན་མའི་ལས་འཆར་ཟུར་བཙུགས་ཀྱིས་ཐུགས་འགན་ཆ་ཚང་བཀའ་ཟུར་ལྕམ་སྐུ་རིན་ཆེན་མཁའའགྲོ་མཆོག་ནས་བཞེས་གནང་ཡོང་བའི་འབོད་བསྐུལ་ཞུས་པ་བཞིན།  གཙོ་བོ་༧གོང་ས་༧སྐྱབས་མགོན་ཆེན་པོ་མཆོག་གི་མཚན་སྙན་དང་ཐུགས་རྗེའི་བཀྲིན་འོག་བུད་མེད་ལྷན་ཚོགས་ཀྱི་ཚོགས་ཟུར་དང་བཀའ་ཟུར་བཙུན་མའི་ལས་འཆར་གྱི་དབུ་འཛིན་མཆོག་ནས་དངོས་གནས་དྲང་གནས་སངས་རྒྱས་ཀྱི་བསྟན་པ་རིན་པོ་ཆེ་ཉམ་པ་སླར་གསོ་དང་མི་ཉམ་རྒྱུན་འཛིན་གོང་འཕེལ་གྱི་ཞབས་འདེགས་ཆེད་ཐབས་མཁས་ཐོག་སྐུ་ལས་དུ་མ་བསྐྱོན་པ་དང་སྐྱོན་མུས་ལ་བརྟེན།  ཁྱབ་ཁོངས་བཙུན་དགོན་ཁག་གི་འཛིན་སྐྱོང་དང་། བསླབ་པ་སློབ་གཉེར། གནས་མལ་གང་ཅིར་བསམ་ཡུལ་ལས་འདས་པའི་མཐུན་རྐྱེན་ འཛོམས་པོ་དང་ཚགས་ཚུད་ཐོག་ཡར་རྒྱས་གོང་འཕེལ་ངང་ཁ་ཡོད་ལག་ཡོད་ཀྱིས་རླབས་ ཆེན་པོས་ཕན་ཐོགས་གནང་བཞིན་པར་བཀའ་ཟུར་ལྕམ་སྐུ་མཆོག་ལ་ཐུགས་རྗེ་བཀྲིན་ཆེ་ ཞུ་རྒྱུ་ཡིན།

DSC03211དེ་རིང་སྒྲོལ་མ་གླིང་དུ་བཙུན་མའི་འཇང་དགུན་ཆོས་ཐེངས་བཅུ་དགུ་པ་ཚོག་བཞིན་པ་ དང་དེའི་སྔོན་དུ་ཐེངས་བཅོ་བརྒྱད་འཚོགས་ཟིན་པ་རེད།  འཇང་དགུན་ཆོས་དེ་བཞིན་སློབ་གཉེར་བ་རྣམས་ལ་མཁས་པའི་རྩོད་རྒྱུགས་ཀྱི་སྡེང་ཆ་གལ་ཆེན་པོ་ཞིག་ཆགས་ཀྱི་ཡོད་པ་ལྟར།  མཁས་མང་འདུས་པའི་རྩོད་རྒྱུགས་ཀྱི་ལམ་ནས་རིག་པ་དང་རྣམ་དཔྱོད་འཕེལ་ རྒྱས་གཏོང་རྒྱུར་དགེ་ཚན་ལྡན་ཡོད།  དེ་ཡང་༧སྤྱི་ནོར་༧གོང་ས་༧སྐྱབས་མགོན་ཆེན་པོ་ མཆོག་གི་ཐུགས་བརྩེ་ཆེན་པོས་བཙུན་མ་རྣམས་ལ་གཞུང་ཆེན་བཀའ་པོད་ལྔ་ལ་བསླབ་པ་སློབ་གཉེར་བྱེད་རྒྱུའི་གོ་སྐབས་གསོལ་བསྩལ་གནང་ཡོད་པའི་སྐུ་དྲིན་ཉག་གཅིག་ལ་བརྟེན་ནས་བྱུང་བ་རེད་བསམ་གྱི་ཡོད།

ད་དུང་བཙུན་མ་ཚོས་སློབ་གཉེར་མཐར་ཐོན་རྗེས་རྒྱུགས་སྤྲོད་ལམ་ནས་དགེ་བཤེས་མའི་མཚན་གནས་བཞེས་ཐུབ་རྒྱུ་གལ་ཆེན་ཡིན་སྐོར།   ༧གོང་ས་མཆོག་གི་བཀའ་སློབ་ནན་ཆེ་ ཐེངས་མང་ཕེབས་ཡོད་པ་དེའི་ཐོག་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་མཆོག་གིས་ཐུགས་འགན་རྐང་བཞེས་ཀྱིས། ཆོས་རྒྱུད་ཁག་གི་དབུ་འཁྲིད་རྣམ་པ་དང་གནད་ཡོད་མི་སྣ་ལྷན་ཚོགས་ཀྱིས་ཐེངས་མང་དགེ་བཤེས་མའི་རྒྱུགས་སྤྲོད་གཏོང་ཕྱོགས་ལ་བགྲོ་གླེང་གནང་ཡོད་པས་གྲུབ་འབྲས་སུ། ཕྱི་ལོ་ཕྱི་ལོ་༢༠༡༣ཕྱི་ཟ་༥ ཚེས་ ༢༠ཉིན་དགེ་བཤེས་མའི་རྒྱུགས་སྤྲོད་ཐེངས་དང་པོ་དངོས་སུ་དབུ་འཛུགས་ཀྱིས་གཞུང་ཆེན་བཀའ་པོད་ལྔ་ལ་འབྲི་རྒྱུགས་དང་རྩོད་རྒྱུགས་བླངས་ཡོད་པའི་ནང་བཙུན་དགོན་ཁག་ལྔ་ནས་བཙུན་མ་ཞལ་གྲངས་༢༧ ནས་རྒྱུགས་སྤྲོད་ནང་ཆ་ཤས་བཞེས་ཡོད་པ་དང་ཕྱི་ཟླ་༦ ཚེས་༣ ལ་མཇུག་བསྡོམས་གནང་ཡོད།

དགེ་བཤེས་མའི་རྒྱུགས་སྤྲོད་གནང་སའི་སྡེངས་ཆ་ཡོད་དགོས་པ་དེ་ཧ་ཅང་གི་གལ་ཆེན་པོ་རེད་བསམ་གྱི་ཡོད། གང་ལ་ཞུས་ན།  སློབ་གཉེར་བ་སོ་སོར་སློབ་སྦྱོང་གནང་རྒྱུར་དམིགས་ཡུལ་ངེས་ཅན་ཚད་འཛིན་ས་ཞིག་ཡོད་ན། དེས་སློབ་གཉེར་གནང་སྟངས་ལ་ཁྱད་པར་ཆེན་པོ་བཟོ་ཡོད་རེད་བསམ་གྱི་ཡོད། ལོ་མང་རིང་སློབ་གཉེར་གནང་རྗེས་སྦྱང་འབྲས་ལ་ངོས་ འཛིན་ཐུབ་ཆེད་རྒྱུགས་སྤྲོད་ལམ་ནས་གཟེངས་ཐོན་གྱི་ཕྱག་འཁྱེར་བསྩོལ་གསལ་གནང་རྒྱུ་གལ་ཆེན་པོ་ཆགས་ཀྱི་ཡོད་རེད། དེས་སློབ་སྦྱོང་གལ་ཆེན་པོ་ཡིན་པ་དང་། སོ་སོའི་དམིགས་ཡུལ་བསྒྲུབ་རྒྱུར་མཐར་ལམ་ཞིག་ཡོད་པར་སོང་ཚང་མས་འགན་དང་འབད་བརྩོན་རང་བཞིན་གྱི་ཆེ་བ་སླེབས་ཀྱི་རེད་བསམ་གྱི་ཡོད།     བཙན་བྱོལ་ནང་དགེ་བཤེས་མའི་རྒྱུགས་སྤྲོད་ཀྱི་སྲོལ་གཏོད་ཐུབ་པ་དང་ཆ་ཤས་བཞེས་ཐུབ་པ་བྱུང་བ་བཅས་ནི།  བོད་ཀྱི་ལོ་རྒྱུས་ནང་སྔར་བྱུང་མྱོང་མེད་པའི་ལོ་རྒྱུས་རང་བཞིན་ལྡན་པའི་རྩ་ཆེ་དང་གཟི་བརྗིད་ལྡན་པ་ཞིག་བྱུང་བ་དེ་ནི་གཙོ་ཆེ་བླ་ན་མེད་པའི་དབུ་འཁྲིད་༧སྐྱབས་མགོན་རིན་པོ་ཆེན་མཆོག་གི་བཀྲིན་ཁོ་ན་ལ་བརྟེན་ནས་བྱུང་བ་ཞིག་ཡིན་དུས་གོ་སྐབས་དེ་ནི་དངོས་གནས་དྲང་གནས་རྩ་ཆེའི་འགྱུར་བ་ཞིག་དང་།  བསྐལ་པ་བཟང་པོ་ཞིག་ལ་ངོས་འཛིན་ཞུ་དགོས་ཀྱི་རེད་བསམ་གྱི་ཡོད།  དེ་འདྲ་ཡིན་ཙང་ཐེངས་དང་པོའི་དགེ་བཤེས་མའི་རྒྱུགས་སྤྲོད་ནང་ཆ་ཤས་བཞེས་མཁན་མཁས་བཙུན་རྣམ་པའི་བློ་སྟོབས་དང་། སྙིང་རུས། ཡར་རྒྱས་ཀྱི་རྣམ་དཔྱོད་བཅས་ལ་རྗེས་སུ་ཡི་རངས་དང་བསྔགས་བརྗོད་ཀྱིས་དམིགས་བསལ་གྱི་འཚམས་འདྲི་བཀྲིས་བདེ་ལེགས་ཞུ་རྒྱུ་དང་ཆབས་ཅིག་མ་འོངས་པར་ཡང་ཐོབ་དཀའི་གོ་སྐབས་ཐོབ་ཡོད་པ་དེ།  རྣམ་གཡེང་དང་བྱིང་རྨུགས།  ལེ་ལོ་བཅས་ཀྱི་དབང་དུ་མ་སོང་བར།  དཀའ་བ་སྤྱད་དེ་རང་གཞན་གཉིས་ལ་སྨན་པ་བསླབ་པ་སློབ་གཉེར་མཐར་འཁྱོལ་བ་གནང་རྒྱུ་གལ་ཆེན་པོ་ཡིན་པ་དང་། དགེ་བཤེས་མའི་རྒྱུགས་སྤྲོད་ནང་ཆ་ཤས་བཞེས་མཁན་ཇེ་མང་ཇེ་མང་དུ་ཕེབས་ཐུབ་པ་གནང་སྟེ།  སྤྱི་ཚོགས་ནང་ནང་ཆོས་ཐོག་ཚད་མཐོའི་ཞབས་འདེགས་ཞུ་ཐུབ་པ་དགོས་རྒྱུ་དང་། ལྷག་པར་བོད་ནང་རྒྱ་གཞུང་གིས་བོད་ཀྱི་རྩ་ཆེའི་ཆོས་རྩ་མེད་བཟོ་རྒྱུར་སྒོ་ཀུན་ནས་དྲག་གནོན་བྱེད་ཀྱི་ཡོད་པ་དེས་ཆོས་དང་རིག་གཞུང་ཉམས་རྒུད་འགྲོ་བཞིན་པ་དེ་དག་ཉམ་པ་སོར་ཆུད་དང་མི་ཉམས་རྒྱུད་འཛིན་གནང་རྒྱུའི་འགན་ཆེན་པོ་རང་དབང་ཡུལ་གྲུའི་ནང་ཡོད་པ་རྣམས་ལ་ཡོད་ན་དེ་ལུགས་ཀྱི་དགོངས་པ་ཟབ་བཞེས་ཐོག་རང་ཉིད་རང་གི་ལྐོག་ ཏུ་འགྱུར་བ་ཞིག་མ་ཡིན་སྟབས་ཚང་མས་དང་བས་ཀུན་ནས་བླངས་ཏེ་ཧུར་ཐག་གནང་གི་ཡོད་རེད་ལ་མུ་མཐུད་དེ་གནང་རོགས་གནང་ཞུ་རྒྱུ་དང་།  ཕྱོགས་མཚུངས་རང་ཉིད་ལས་སྣེ་གང་དུ་ཡོད་པ་དེར་གཞན་གྱིས་ཞིབ་འཇུག་གནང་མཁན་ཡོད་མེད་ལ་མ་བལྟོས་པར་འགན་རང་འཁུར་གྱིས་སྒོ་གསུམ་གྱི་སྤྱོད་པ་ཡ་རབས་བཟང་སྤྱོད་ལྡན་རྒྱུ་དེའང་བོད་མི་ རིགས་ཀྱི་གོམས་སྲོལ་བཟང་པོ་མཚོན་གྱི་ཡོད་ན། དེའི་ཐོག་ལའང་བཙུན་དགོན་སོ་སོའི་ནང་ལྷོད་ཡངས་མེད་པར་སྔར་ལས་ལྷག་དམ་དོན་དང་།  ཕྱི་ནང་མཚུངས་པའི་སྤྱོད་ལམ་དགོས་རྒྱུ་དེ་ཧ་ཅང་གི་གལ་ཆེན་པོ་རེད་ལ་དེ་ལྟར་ཟབ་ནན་དགོས་པ་འབོད་བསྐུལ་ཞུ་ཡི་ཡོད།

བཙུན་མའི་ལས་འཆར་གྱི་དབུ་འཛིན་དང་བཀའ་ཟུར་ལྕམ་སྐུ་རིན་ཆེན་མཁའ་འགྲོ་མཆོག་ནས་བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་ནང་སླར་གསོ་ཞུ་བའི་སྐབས་ནས་བཟུང་ཐུགས་འགན་ཆེན་བཞེས་གནང་སྟེ་ཕྱག་ལས་རྒྱ་ཆེན་པོ་གནང་ཡོད་ལ།  དེང་གི་འཆར་ཡང་ང་ཚོར་དཀའ་ངལ་ནམ་འཕྲད་སྐབས་ལམ་སྟོན་ཞུས་པ་བཞིན་སློབ་སྟོནཡང་དག་པ་གནང་གི་ཡོད་པར།  གོ་སྐབས་འདི་བརྒྱུད་ནས་དམིགས་བསལ་གྱི་ཐུགས་རྗེ་བཀྲིན་ཆེ་ཞུ་རྒྱུ་དང་།  མ་འོངས་པར་ཡང་ལམ་སྟོན་བཀའ་སློབ་གནང་སྐྱོང་ཡོང་བ་ཞུ་རྒྱུ་ ཡིན།

མཐའ་དོན།  ཁམས་གསུམ་ཆོས་ཀྱི་རྒྱལ་པོ་འཛམ་གླིང་ཞི་བདེའི་དེད་དཔོན་༧སྤྱི་ནོར་༧གོང་ས་༧སྐྱབས་ མགོན་ཆེན་པོ་མཆོག་སྐུ་ཚེ་༧ཞབས་པད་བསྐལ་བརྒྱའི་བར་དུ་བརྟན་པ་དང།  ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་སྟེ་གཞི་བྱེས་མཉམ་འཛོམས་ཡོང་བའི་སྨོན་འདུན་དང་། དེ་བཞིན་བསྟན་འཛིན་གྱི་སྐྱེས་ཆེན་དམ་པ་གང་ན་སུ་བཞུགས་རྣམ་པ་བསྟན་དང་འགྲོ་བའི་དོན་དུ་སྐུ་ཚེ་ཡུན་དུ་བརྟན་པའི་སྨོན་འདུན་ཞུ་རྒྱུ་དང་།  ཆོས་ར་ཆེན་པོ་དར་ཞིང་རྒྱས་པའི་སྨོན་འདུན་ཡོད།